പുതിയ നിയമത്തിൽ നമ്മെ രണ്ടു വിധത്തിലുള്ള ഓഹരിയെ പറ്റി പഠിപ്പിക്കുന്നു. എബ്രായ ലേഖനം മൂന്നാം അധ്യായത്തിൽ സ്വർഗ്ഗീയ വിളിക്കുള്ള ഓഹരിയെ പറ്റി രേഖപ്പെടുത്തിയിരിക്കുന്നു. അതുപോലെ വെളിപ്പാട് പുസ്തകം ഇരുപത്തിയൊന്നാം അധ്യായം തീയും ഗന്ധകവും കത്തുന്ന പൊയ്കയുടെ ഓഹരിയെക്കുറിച്ച് കൂടി നമ്മെ ഓർമിപ്പിക്കുന്നു.
നമ്മുടെ അനുദിന ജീവിതത്തിൽ സ്വത്തുക്കളിൽ, ഭരണത്തിൽ, നേട്ടങ്ങളിൽ, അധികാരങ്ങളിൽ ഇതിലെല്ലാം ഓഹരി വേണമെന്ന് ആഗ്രഹിക്കുന്നവരാണ് മനുഷ്യൻ. എന്നാൽ ദൈവം നമ്മെക്കുറിച്ച് ആഗ്രഹിക്കുന്നത് വ്യത്യസ്തമായാണ്. “യഹോവ എന്റെ ഓഹരി എന്നു എന്റെ ഉള്ളം പറയുന്നു; അതുകൊണ്ടു ഞാൻ അവനിൽ പ്രത്യാശവെക്കുന്നു” വില:3:24
നശ്വരമായ ലോകത്തിന്റെ നേട്ടങ്ങളിൽ മാത്രം കണ്ണുനട്ടിരിക്കുന്ന മനുഷ്യൻ, തനിക്ക് ലഭിക്കേണ്ട ആത്മീയമായ ഓഹരിയെക്കുറിച്ച് വിസ്മരിച്ചുപോകുന്നു. എന്നാൽ ദൈവം നമുക്കായി കരുതിവെച്ചിരിക്കുന്ന “നല്ല ഓഹരി” ഒരിക്കലും നീക്കം ചെയ്യപ്പെടാത്തതും ശാശ്വതവുമാണ്. മറിയയെപ്പോലെ കർത്താവിന്റെ പാദപീഠത്തിലിരുന്ന് ആ നല്ല ഓഹരി തിരഞ്ഞെടുക്കുവാൻ നമുക്ക് സാധിക്കുന്നുണ്ടോ എന്ന് ഈ വചനങ്ങൾ നമ്മെ ചിന്തിപ്പിക്കുന്നു.
ദൈവത്തെ സ്വന്തം ഓഹരിയായി സ്വീകരിക്കുന്നവർക്ക് ജീവിതത്തിലെ പ്രതിസന്ധികളിലും തളരാതെ നിൽക്കുവാനുള്ള പ്രത്യാശ ലഭിക്കുന്നു. വിലാപങ്ങൾക്കിടയിലും “യഹോവ എന്റെ ഓഹരി” എന്ന് ഉറച്ചുപറഞ്ഞ പ്രവാചകന്റെ വിശ്വാസം നമുക്കും മാതൃകയാകണം. നിത്യതയുടെ ഓഹരിയാണോ അതോ ലോകത്തിന്റെ നശ്വരമായ ഓഹരിയാണോ നാം ആഗ്രഹിക്കുന്നത് എന്ന ഗൗരവകരമായ ചോദ്യം നമ്മുടെ മുന്നിലുണ്ട്. സ്വർഗ്ഗീയവിളിക്കുള്ള ഓഹരിയിലേക്ക് നമ്മുടെ ശ്രദ്ധ കേന്ദ്രീകരിക്കുമ്പോൾ, ഈ ലോകത്തിലെ കുറവുകൾക്കിടയിലും ദൈവത്തിന്റെ കരുതലിന്റെയും സംരക്ഷണത്തിന്റെയും ആഴം നമുക്ക് അനുഭവവേദ്യമാകും.